Hæ litli!

Var það ekki kveðjan sem hljómaði oftar en ekki í Heilsubælinu á sínum tíma. Það held ég bara. Mánagötu-efri hæð er ekki hægt að kalla neitt annað en Heilsu(leysis)bæli þessa dagana. Svei attan. Unglingur hefur bæst í hóp annars afar tuskulegra sjúklinga, en það gerði hann síðdegis í gær. Ég er þó verst haldin- enda bráðum löggilt gamalmenni og tekur gamla fólkið þetta ekki verst af öllum?!

Semsagt. Ég var farin að gera mér sterkar vonir að smella mér í vinnuna á morgun og auk þess var ég búin að panta far fyrir börn og buru í borg óttans á föstudaginn. Já, helgarferð "á heimaslóðir" skyldi það vera! En nei!

Gafst upp fyrir eigin þrjósku í dag og gekk á læknisfund síðdegis þegar ég áttaði mig á því að ég veigraði mér við því að hósta. Jú var það ekki. Slæmt inflúensutilfelli, kinnholusýking auk lungnabólgu! Fari það í norður og niðurfallið! Læknir sagði kerlu að senda ættingja fyrir sig í apótek til þess að leysa út dóp á dóp ofan en sjálf ætti hún að liggja hreyfingarlaus undir sæng og láta á það reyna að koma fram úr á mánudaginn! Arrrg!

...þannig að, engin suðurferð með tilheyrandi stuði og heimsóknum. Ef þið fréttið af því að á árshátíð Alcoa Fjarðaáls hafi aðeins verið borið fram þurrt kornflex og gestum úthlutað krossgátublaði þá vitið þið af hverju. Forkvinnan var lítt starfhæf og eyddi öllum sínum tíma á undirbúningstímabilinu undir þremur sængum og sautján flísteppum!

______________________

Alla síðustu helgi var aukabarn á heimilinu. Kippti mer svosem ekkert upp við það þar sem vinir barnanna koma oft í heimsókn og finnst mér varla muna um eitt til eða frá...

En aukabarn það dúkkaði upp á föstudagsseinnipart og er hér enn. Verð nú að segja að ég er orðin pínu þreytt á því. Barnið kemur frá Reykjavík og er ofdekrað með eindæmum! Vill bara pylsur og kókópuffs. Það þarf að halda á því daginn út og inn. Auk þess er það svo feimið að aðeins Bríet getur talað það til...

Barnið vill ekki fyrir nokkra muni taka þátt í daglegu lífi, svo sem því að fara á leikskóla. Nei, frekar hangir það í bílnum daglangt og bíður eftir að dagurinn líði og vinkonan komi heim. Hann heitir Árni og er þriggja ára. Árni er ósýnilegui vinur hennar Bríetar!

Athugasemdir

[Hlín (IP-tala skráð) 3.4.2008 kl. 11:32]

Vona að flensufaraldurinn fari að hypja sig í burtu af Mánagötunni.  Bið að heilsa Árna.

[Ingibjörg Friðriksdóttir, 3.4.2008 kl. 16:05]

Verður maður löggilt gamalmenni fyrir þrjátíuogfimmára aldurinn  í þinni sveit?  Bara spyr, því þá hlýt ég að vera á grafarbakkanum.

Látið ykkur batna! 

[Kristín Björg Þorsteinsdóttir, 4.4.2008 kl. 16:51]

Vesalings þú og vesalings fjölskyldan!

Ég hef verið í kvefi og ómennsku en er að koma til.

Láttu svo sjá þig stelpa næst þegar þú kemur til byggða. Nú er ég á 2. hæðinni í vellystingum pragtuglega með útsýni yfir Esjuna!

[Solveig Friðriksdóttir, 5.4.2008 kl. 10:50]

Gangi þér vel að safna kröftum á ný