Mamma "gava"

Oft á tíðum líður mér eins og Barbamömmu! Þarf iðulega að bregða mér í allra kvikinda líki. Í dag- sem svo oft áður var ég grafa! Já já...

Þór: Vera gava* mín mamma (orðskýring neðst*)

Ég: Já, allt í lagi- á ég að sitja í sófanum?

Þór: Já

...grafan kom sér fyrir í sófanum! Þór brasaði og brasaði. Gerði varla annað en að losa og festa beltið til skiptis því bilanatíðni græjunnar var óvenju há! Uss, uss! Gröfukarlinn var þó óvenju töff, með sólgleraugu og allan pakkann! Grafan gleymdi sér um stund og kyssti kröfukarlinn á bakið þar sem hann var eitthvað að brasa í mælaborðinu...

Þór: Hættu!

Ég: Já, fyrirgefðu

...gröfukarlinn hélt áfram að brasa og baksa. Boraði þessi ósköp og skipti um dekk. Allt í fári. Kom að lokum aftur í gröfuna. Enn og aftur missti grafan taktinn, steingleymdi sér og kyssti gröfukarlinn á bakið. Aftur og nýbúin! Ófyrirgefanlegt, greinilega...

Þór: Hættu sessu! Gövan ekki gissa gövugallinn!

Orðskýring: Þegar ég er grafan hans Þórs þá sit ég í stofusófanum með bognar fætur. Hann situr ofan á mér og stýrir gröfunni. Þór er "gröfukarlinn". Grafan er oftar en ekki biluð og mestur tími gröfukarlsins fer í að bora í hana, saga eða smíða eða brasa eitthvað sem við á í hvert skipti!

 

Hæ litli!

Var það ekki kveðjan sem hljómaði oftar en ekki í Heilsubælinu á sínum tíma. Það held ég bara. Mánagötu-efri hæð er ekki hægt að kalla neitt annað en Heilsu(leysis)bæli þessa dagana. Svei attan. Unglingur hefur bæst í hóp annars afar tuskulegra sjúklinga, en það gerði hann síðdegis í gær. Ég er þó verst haldin- enda bráðum löggilt gamalmenni og tekur gamla fólkið þetta ekki verst af öllum?!

Semsagt. Ég var farin að gera mér sterkar vonir að smella mér í vinnuna á morgun og auk þess var ég búin að panta far fyrir börn og buru í borg óttans á föstudaginn. Já, helgarferð "á heimaslóðir" skyldi það vera! En nei!

Gafst upp fyrir eigin þrjósku í dag og gekk á læknisfund síðdegis þegar ég áttaði mig á því að ég veigraði mér við því að hósta. Jú var það ekki. Slæmt inflúensutilfelli, kinnholusýking auk lungnabólgu! Fari það í norður og niðurfallið! Læknir sagði kerlu að senda ættingja fyrir sig í apótek til þess að leysa út dóp á dóp ofan en sjálf ætti hún að liggja hreyfingarlaus undir sæng og láta á það reyna að koma fram úr á mánudaginn! Arrrg!

...þannig að, engin suðurferð með tilheyrandi stuði og heimsóknum. Ef þið fréttið af því að á árshátíð Alcoa Fjarðaáls hafi aðeins verið borið fram þurrt kornflex og gestum úthlutað krossgátublaði þá vitið þið af hverju. Forkvinnan var lítt starfhæf og eyddi öllum sínum tíma á undirbúningstímabilinu undir þremur sængum og sautján flísteppum!

______________________

Alla síðustu helgi var aukabarn á heimilinu. Kippti mer svosem ekkert upp við það þar sem vinir barnanna koma oft í heimsókn og finnst mér varla muna um eitt til eða frá...

En aukabarn það dúkkaði upp á föstudagsseinnipart og er hér enn. Verð nú að segja að ég er orðin pínu þreytt á því. Barnið kemur frá Reykjavík og er ofdekrað með eindæmum! Vill bara pylsur og kókópuffs. Það þarf að halda á því daginn út og inn. Auk þess er það svo feimið að aðeins Bríet getur talað það til...

Barnið vill ekki fyrir nokkra muni taka þátt í daglegu lífi, svo sem því að fara á leikskóla. Nei, frekar hangir það í bílnum daglangt og bíður eftir að dagurinn líði og vinkonan komi heim. Hann heitir Árni og er þriggja ára. Árni er ósýnilegui vinur hennar Bríetar!

Ætli Jesú hafi bara ekki verið húðlitaður!

Hef varla áttað mig á því hvort ég er lífs eða liðin síðustu tvo sólarhringa- hvort ég er hér, eða kannski bara þar! Ástæðan er skæð inflúensa að doktors-sögn! Ja, öllu má nú ofgera segi ég nú bara!

Hófst á sunnudag með veikindum Þórs þrumuguðs. Varð hann allur hinn snúnasti og funheitur þess utan og í kjölfarið fylgdi stóra systir. Móðir gat ekki látið sitt eftir liggja og lagðist flöt á sunnudagskvöldið!

Ég man aðeins einu sinni áður eftir því að hafa orðið svona "drullu" veik á mínum fullorðinsárum og var það fyrir nokkrum árum. Veikin lýsir sér nokkurnvegin svona...

• Hitastig- hangir sífellt í 38,5
• Háls; alsettur rakvélablöðum
• Útlimir; alsettir bein og vöðvaverkjum
• Höfuð; klofið, ef það er þá enn á!
• Hvíldarpúls; 110-120!
• Endalaus svimi

Doktorinn sagði mér að búa mig undir vikutímabil af skemmtilegheitunum! Neita að trúa því, þar sem fátt kemur í veg fyrir að íslendingar hafi áhyggur af vinnunni sinni. Það er vægast sagt brálað að gera í henni þessa dagana og ef ég fer ekki að koma mér af stað veit ég ekki hvort ég held titlinum sem Ylfa Mist stakk upp á hér um blogginu um daginn- "forkvinna" árshátíðanefndar!

_____________

En heimsmálin eru yfirleitt leyst á Mánagötu 12.  Ekkert vantar upp á það...

Bríet: Mamma- er Jesú nýdáinn?

Ég: Nei, nei- það er mjög langt síðan hann dó

Bríet: Nú, en af hverju var þá verið að flagga í hálfa stöng fyrir honum um daginn?

Ég: Það er bara alltaf gert um páskana

Bríet: Hvernig var Jesús á litinn

Ég: Uuu. Það eru nú örugglega skiptar skoðanir á því

Bríet: Hvítur, eins og við?

Ég: Kannski. Kannski halda þeir sem eru fæddir í Kína- eins og Dagbjört Lee að hann hafi verið eins á litinn og þau

Bríet: Já, og krakkarnir í Afríku halda kannski að hann hafi verið svartur eins og þau

Ég: Já, einmitt!

Bríet: Æi, segjum bara að hann hafi verið húðlitaður!

...já er það ekki bara fín lending!

Set að lokum inn nokkrar myndir af fannferginu um helgina! Nú má alveg fara að vora held ég...

 

Undarlegar eldingar...

Fæ oft afar undarlegar eldingar í hausinn. Þar sem ég sat í Laugardalshöllinni í fyrra- ásamt mörg þúsund öðrum sönnum Sykurmolaaðdáendum og beið spennt eftir að sjá goðið mitt stíga á stokk fékk ég mynd í hausinn...

Björk Guðmundsdóttir hefur verið mitt Idol síðan ég var lítil. Hef líklega verið tæplega tíu ára þegar hún var með óléttuna út í loftið. Bara flott. Mamma strauk sér um höfuðið og tautaði fyrir munni sér að þetta gæti varla verið góð fyrirmynd fyrir dóttluna! En ég hef dáð Björk allar götur síðan og farið á flesta þá tónleika sem hún hefur haldið hérlendis...

Fór í höllina með Hlínsu vinkonu minni og varð henni líklegast til skammar. Táraðist af hrifningu trekk í trekk, var ekki töffari fyrir fimm aura! Nema hvað! Þar sem ég sat og hlustaði á upphitunarbandið  fékk ég mynd og texta í hausinn! Gersamlega!

Sá hana fyrir mér. Mynd með texta. Skissaði myndina upp um leið og ég kom heim. Skrifaði hjá mér textann. Brunaði svo í bæinn daginn eftir til þess að kaupa mér striga og olíu...

... þegar myndin loks þornaði skundaði ég með hana á auglýsingastofu til þess að fjárfesta í setningu. Sá strax að aumingja strákurinn sem afgreiddi mig var alls ekki viss hvort hann ætti að græja fyrir mig setninguna eða hringja beint og láta leggja mig inn! Ákvað loks að gera mér til geðs og út fór ég með þessa setningu í poka:

"Förum á refaveiðar í sólarlaginu- með blómakrans í hárinu og í háhæluðum skóm"

...ætlaði að "mynda myndina" og skella henni hérna inn en það gengur greinilega ekki nema í björtu! Geri það á morgun...

Ör-hugleiðing um menn og konur

Er stanslaust í símanum þessa dagana að redda blessaðri árshátíðinni! Endalaust. Alltaf eitthvað nýtt...og spennandi. Kynnti mig á einum stað í dag sem "formann" árshátíðanefndar. Var spurð á móti hvort ég væri þá ekki frekar "forkona"...

...jú líklega, en mér þykir orðið ekki fallegt!

Ljósmyndarinn Bríet

Bríet er fimm ára ljósmyndari. Þessi er úr sömu syrpu og hin...

Páskadagur í máli...en þó aðallega myndum!

Fallegur dagur. Myndavélin hékk um háls minn í allan dag eins og svo oft áður. Dagurinn byrjaði að sjálfsögðu súkkulaðiáti...

...svo fórum við á Stöddann til ömmu Jónu og allra hinna...

Sigþór mömmu-bróðir varð "afi" á dögunum, en Freyja eignaðist hvorki meira né minna en níu guðdómlega hvolpa, langar einhvern í?

...eftir hvolpastuðið fórum við inn í fjarðarbotn, í fjöruna- það er alltaf bara geggjað! Sjáið bara...

...krakkarnir voru í essinu sínu...

...þessi hópur er bara guðdómlegur...

...svo skellti unglingur sér bak við vélina og hvatti móður og börn til ýmissa uppátækja...

...svona var páskadagurinn okkar!

 

Mamma- þetta snýst nú bara um þyngdarlögmálið...

Varð bara að deila þessu með ykkur. Var að koma frá því að kyssa unglinginn góða nótt. Spjallið barst að skíðaferð gærdagsins. Skemmst er frá því að segja að ég er aðeins á fyrstu metrum míns skíðaferils, á ekki einu sinni græjur. Ætla ekki að kaupa skíði, heldur bretti næsta vetur, en hvað um það...

Samtalið var eitthvað á þessa leið:

Almar Blær; Hvað fórstu margar ferðir í stóru lyftunni í gær?

Ég; Uuuu, tvær. Eina alveg upp og aðra svo til þess að komast aftur niður að skála. Ég get nú ekki sagt að ég hafi sýnt einhverja meistaratakta, var alveg að skíta á mig við það að komast niður!

Almar Blær; Maður kemst nú alltaf niður, þó hægt fari

Ég; Ja, það var nú varla í mínu tilfelli, ég var alvarlega að spá í að vera bara uppi!

Almar Blær; Mamma mín- þetta snýst nú bara um þyngdarlögmálið. Allt sem fer upp- kemur niður!

...jú jú, ætli það ekki. En af hverju ætli ég íhugi oft hvort okkar sé eldra, ég eða ellefu ára sonur minn?

p.s. Í guðanna bænum- ekki láta ykkur detta í hug að þið lendið bak við lás og slá við það að kommenta á færslurnar

Heimsborgarinn Sara slött!

Hóf bloggferil minn á því að fjalla um eigin fatasmekk. Greindi frá því að ég ætti ekki nánast ekki spariföt í fórum mínum og myndi aldrei ganga í svörtum buxum með broti. Er nánast hálfgerður "skoppari". Nei kannski ekki alveg, en allt að því...

Einn morguninn ekki alls fyrir löngu vaknaði ég og var í öðru skapi en vanalega. Klæddi mig í þröngar gallabuxur, frekar fínan bol og pinnahæla. Fór í vinnuna að sjálfsögðu. Var ekki fyrr komin á "básinn minn" þegar stelpurnar byrjuðu...

"Noh, bara gella- gella"

"Vó, það er naumast- stendur eitthvað til?"

..þarna var mér farið að líða eins og ég liti alltaf út eins og alger drusla!

"Mín bara þvílíkt á fríkkunni, þú ert ekkert smá flott í dag. Þú ert svona...Söruleg"

...þetta var magnaðasta kommentið. Söruleg. Svísu-restin tók hugmyndina traustataki- og það sem eftir lifði dagsins var ég ekki kölluð neitt annað en Sara. Sara slött!

Líklega viku seinna vaknaði ég aftur í sambærilegu skapi. Vaknaði sem Sara. Það var eins og við manninn mælt, ég var ekki kölluð annað en Sara þann daginn. Djókið vatt upp á sig og búið er að klambra saman fortíð Söru!

Hún kemur semsagt og leysir Krissu af í blaðamennskunni í Alcoa þegar hún þarf frí. Sara er ekki í vandræðum með það þar sem hún hefur unnið í NY í áraraðir sem einn þekktasti pistalhöfundur borgarinnar. Er náin vinkona gellanna í Sex and the city- drekkur alltaf með þeim cosmó á föstudögum. Hún hefur einnig setið fyrir á öllum helstu forsíðunum!

Í síðustu ferð sinni á klakann dró hún vinkonu sína og samstarfskonu með sér sem leysir Mörtu vinkonu Krissu af þegar hún þarf að sinna börnum og buru. Vinkona Söru heitir Ísabella. Hún er álíka slöttí gella og Sara og er farin að dúkka upp í tíma og ótíma á Mörtu bás. Hvar endar þetta...

...á því miður ekki myndir af þeim vinkonum Söru og Ísabellu en þið getið prófað að "glúggla" þær- hljóta að dúkka upp einhverjar forsíðumyndir af þeim stöllum! Ekki má það minna vera...

Ég veit nákvæmlega hvar ég ætla að vera fimmtudaginn 12. júní næstkomandi...

...já það er algerlega á kristaltæru! Ég verð ásamt Elísabetu vinkonu í Laugardalshöllinni að hlusta á okkar ástkæra James Blunt! Vá hvað ég hlakka til...

 

James Blunt með tónleika 12. júní